على هوى الخفاق عنّيـت الأقـدام=ولا نشدت القلـب وشهـي نوايـاه

مادام لـي قلـبٍ شجيـعٍ وعـزّام=ومادام سلم الطيب نهجـه ومبـداه

ودام الأمل باقي على كـف الأيـام=ما جابتـه سـود الليالـي قبلنـاه

لو إن قلبي فيـه مـن وقتـه آلام=الصبـر عـاده للرجـال المسمـاه

إن طولت دنيـاي مانيـب منضـام=من فضل من فاضت علينا عطايـاه

أعيش عيشة حـر جـازم ومقـدام=مع درب ربعٍ تكسب الطيب والجـاه

أركض وأجيب أرقام وأحطم أرقـام=ورجلي على درب المراجل مضـراه

وإن مت، أنا مخلوق من جلد وعظام=يرحمني اللـي كـل خلقـه ترجـاه

يالله يا معطـي جزيـلات الأنعـام=مـدّك ، ولا مـد الوجيـه المهبـاه

الحلم ما ساعـد مجمّعـة الأحـلام=واللي زرع له زرع يحسب لمجنـاه

والعمر زرع، وكل زرعٍ لـه حطـام=ولا بد ماهوج العواصيـف تـذراه

والتجربه والديـن للعاقـل أخصـام=يشوف بعيونـه ويحسـب خطايـاه

والمرجلة وهبـة ولا كـل مـن رام=رجم المراجل شـد حيلـه وعـداه

والعز في رفقـة مشاكيـل وحشـام=والجمر يونس حرّته مـن توطـاه

الطيـر يالـولا الجناحيـن ماحـام=والحمل لـولا عزمنـا مـا قوينـاه

والدين مفتاح الفرج ديـن الاسـلام=ومنهج رسولٍ جـاء لنـا واتبعنـاه

ترى العمر يطوى مثل طيّـة الخـام=والرابح اللي سـد دينـه و وفـاه

عيّنت ربع العام واللي ورى العـام=أطيبهم اللي مابقـى غيـر ذكـراه

وحنا بعدهـم والوعـد حـق قـدام=يالله تغفـر كـل ذنــبٍ جنيـنـاه