ألاحي حمام الورق فوق الشجـر لا نـاح=والى من عوى ذيب الخلا صحت له عاوي

واخيل السحاب اللـي تزبـر وبرقـه لاح=ويجذب خيالي في السما نجمهـا الهـاوي

امدّ النظر واقـدح سنـا فكـري اللمّـاح=واشوف الرّحاه تدور والحـلّ مـا يـاوي

انا اشوف دنيانـا كمـا حالـة المسبـاح=يسبّح بها العابـد ويلعـب بهـا الغـاوي

واشوف اليدين القاصرة تقطـف التفـاح=ويمسي عزيز النفس في عزّتـه طـاوي

لك الله يا قلـبٍ ليـا قلـت يدلـه صـاح=عجز ما لقى له في شقـا همّـه مـداوي

تخالف عليـه همـوم بقعـا ولا يرتـاح=والى اقبل ظلام الليل يدوي بـه الـداوي

وانا ما ذبحني يا هل العرف دون سـلاح=سـوى كلمـةٍ عوجـا تلفّـظ بهـا واوي

يحلف اليمين ويدّعي انّه يبـي الاصـلاح=وعند المقابل يرخـي الـراس ويـلاوي

اعرف الهـروج الجـدّ واميّـز المـزّاح=وافرّق ما بيـن الجاونيّـة مـن الجـاوي

واذا كان باب المجد ما لـه معـه مفتـاح=فيقعي على عتبـة هـل المرجلـة ثـاوي

بغينا المكاسـب والسلامـة لنـا الاربـاح=جميلة وبارضٍ سوّ قل لي : كم تسـاوي ؟